Euskadin bizi bazara zure mugikorrean falta ezin diren aplikazioak

Euskadin bizitzea kulturan, naturan eta tradizioetan aberatsa den eskualde batean murgiltzea da. Mendi gorenetatik hasi eta hondartza ikusgarrietara,, bizi-kalitatea paregabea da euskal lurralde honetan. Eta, bertan bizi bazara, zein aplikazio ezin dira falta zure mugikorrean bizi-kalitate horri etekin handiena ateratzeko?

• Euskadi ezagutzeko mugikorreko aplikazioak

Ingurune naturala ezagutzeko tresnak, tokiko kulturan murgiltzeko aplikazioak... Ezagutu nola aberastu dezaketen zure egunerokoa aplikazio hauek eta nola atera diezaiokezun ahalik eta etekin handiena Espainiako iparraldeko lurralde honetan igarotzen duzun denborari.

Euskadin bizi bazara zure mugikorrean falta ezin diren aplikazioak

Jatorriz hemengoak izan arren edo Euskadin aspalditik bizi izan arren, bada beti zer ezagutu eta badira beti tresna berriak bizitza erraztuko digutenak. Ez da hala? Besteak beste, autobusa heltzeko zenbat denbora falta den esaten edo jateko lekurik onenen berri ematen diguten aplikazioak edo medikuaren aplikazioa.

Zuri gauzak errazteko, Euskadin bizi bazara mugikorrean nahitaez eduki beharreko aplikazio sorta bat bildu dugu hemen. Atera boligrafoa eta hartu oharrak, luzerako daukagu eta.

Euskalmet

Ez dezagun geure burua engaina. Euskadin ezer garrantzitsurik bada, eguraldia da. Guk oso gustuko dugun arren, ez da beti hondartzara edo mendira joateko modukoa izaten; bai, ordea, arratsaldez museo batera edo pintxoak jatera joatekoa.

Euskal Meteorologia Agentziaren aplikazio honek eguraldiaren uneko egoeraren eta hurrengo zazpi egunetako iragarpenaren berri ematen dizu. Gainera, Euskalmetek hurrengo hiru egunetako abisu meteorologikoen berri emango dizu, denbora errealean. Halaber, informazio garrantzitsurako hainbat esteka erabilgarri eta larrialdi-telefono ofizialetarako sarbide azkarra eskaintzen dizkizu.

Arrazoi teknikoak direla eta, Euskalmet PWA bat da orain. Beraz, Euskalmeterako sarbide zuzen bat gehitu behar duzu hura mugikorrean edukitzeko. Horrela, informazioa azkarrago atzitu ahal izango duzu, eta bateria gutxiago kontsumituta. Lasai, gailuan instalatuak dituzun gainerako aplikazioek bezala funtzionatzen du.

BizkaiUp

Hasieran, aplikazio honek Bizkaiko hondartzen edukiera eta betetze-mailari buruzko datu eguneratuak eskaintzen zituen, baita aldi baterako itxieren eta itsasoaren baldintzen inguruko informazioa ere. Hala ere, BizkaiUp garatu egin da, eta orain askoz gehiago eskaintzen du. Eduki gehiago gehitu dugu ekitaldi garrantzitsuak barne hartzeko.

Aplikazio honekin, dataren, kokalekuaren edo kategoriaren arabera bilatu ditzakezu ekitaldiak. Gainera, informazio erabilgarria eta Bizkaiko plan turistikoak eskaintzen dizkizugu zure hurrengo eskapada planifikatzen laguntzeko. Tresnak eskaintzen dituen ekitaldi berrienen jakinaren gainean egoteko, ez ahaztu jakinarazpenak aktibatzea!

Mendiak

Mendiak behar-beharrezko aplikazioa da euskal mendiak ezagutzeko. Adituentzat zein hasiberrientzat dago diseinatuta, eta familientzako ibilbideak eta 1500 mendi baino gehiagori buruzko datu xeheak eskaintzen ditu.

Mapa interaktiboei, beste mendizale batzuen iruzkinei eta zure abenturen jarraipen pertsonalizatuei esker, Mendiak bidelagun paregabea duzu eskualdearen edertasun naturala ezagutzeko.

Bagoaz

Euskara ikasiz euskal kulturan murgildu nahi dutenentzat diseinatutako aplikazioa da Bagoaz. Aplikazioa oinarrizko kontzeptuak irakastera dago bideratuta. 36 ikasgai interaktibo ditu erabiltzailea hasiera-hasieratik gidatzeko. Bagoazen abantailetako bat bere hiztegi integratua da. Hari esker, erabiltzaileek erraz bilatu eta ikas ditzakete hitz berriak.

Gainera, aplikazioak adibide praktikoak eskaintzen ditu, hitzek testuinguru bakoitzean duten erabilera hobeto ulertzen laguntzen dutenak. Oso tresna baliagarria da Euskadin bizi diren eta eguneroko bizitzan hobeto integratu nahi dutenentzat.

Osakidetzaren Atari Mugikorra

Osakidetzaren Atari Mugikorra gailu mugikorren bidez osasun-zerbitzuak modu ulergarrian eskaintzeko diseinatutako plataforma bat da. Erabiltzaileei aukera ematen die mediku-hitzorduei, proben emaitzei eta historia medikoari buruzko informazioa eta osasun-arretari lotutako bestelako zerbitzu batzuk atzitzeko.

Gainera, norberaren osasunerako informazioa, sintometan oinarritutako osasun-gomendioak, osasun-inkestak, osasunari buruzko heziketa eta Osakidetzaren beste aplikazio batzuetarako sarbidea eskaintzen ditu.

TrafikoaEJGV

Eusko Jaurlaritzako Segurtasun Sailaren aplikazio ofizialak Euskadiko errepideen egoerari buruzko informazioa eskaintzen du, gorabeherak, obrak, radarrak, trafiko-kamerak, hiriburuetarako sarbideak, mendiko portuak eta trafiko-murrizketak barne.

Halaber, esteka erabilgarriak eta larrialdi-zenbakietarako eta trafikoari buruzko informaziorako sarbide azkarra eskaintzen ditu. Informazio hori guztia denbora errealean eguneratzen da Eusko Jaurlaritzako Segurtasun Sailaren sistema informatikoen bidez.

Moveuskadi

Hau da Euskadin bizi bazara eduki beharreko mugikortasun-aplikazio ofiziala. Bai, baietz, Moovit, Google Maps eta halakoetan ere begiratu dezakezula nola mugitu jakiteko; baina Moveuskadik Euskadiko garraio publikoari buruzko informazio-plataforma oso bat eskaintzen dizu.

Aplikazioak operadore, ibilbide, ordutegi eta geltokiei buruzko xehetasunak ditu, baita helmuga interesgarriei eta bidaien planifikazioari lotutako informazioa ere. Gainera, bizikletak alokatzeko guneei buruzko xehetasunak eta operadoreen zerbitzu-jakinarazpenak ematen ditugu, edonolako aldaketa edo abisu garrantzitsuren berri izan dezazun.

Aplikazio horiei guztiei esker, errazagoa izango zaizu Euskadin bizitzea. Kultur ekitaldiei, deskontuei, hondartzen egoerari eta astebururako mendi ibilbideei buruzko informazioa edukiko duzu, baita hurrengo autobusari iristeko geratzen zaion denborari buruzkoa ere. Eta horri Guuken konexio paregabea gehitzen badiozu, zure mugikorrak ez du besterik beharko.💚