Iruñeko izotz-pista: ordutegia, prezioak...

Gabonak iristean, argiz, musikaz eta jardueraz betetzen da Iruñeko bihotza, eta toki miragarri bihurtzen da. Jarduera erakargarri ugari daude, eta, horien artean, bertakoen eta bisitarien gogokoenetako bat da, zalantzarik gabe, izotz-pista, Sarasate pasealeku ospetsuan kokatua.

• Zer ikusi eta zer egin Iruñean egun batean: harresia, plaza eta pintxoak.

Aurten, esperientzia paregabe batez gozatzeko aukera duzu azaroaren 29tik urtarrilaren 6ra: 285 metro karratu izotz, jai-giroan murgilduak.

Iruñeko izotz-pista: ordutegia, prezioak eta gehiago

Deusek ez ditu "Gabonak" hobeto irudikatzen Iruñeko hirigunean zeru argitu baten pean izotzetan patinatzeak baino. Sarasate pasealekuko izotz-pistak adin guztietarako dibertsioa eskaintzen du jai-giro bikainean, eta Gabonak pozez betetzera itzuli da.

Prest al zaude patinak jantzi eta esperientzia ahaztezin batez gozatzeko? Jakin beharreko guztia kontatuko dizugu!

Iruñeko izotz-pistaren ordutegia

Izotz-pista egunero dago zabalik, eta guztiok patinatu ahal izateko moduko ordutegia du:

• Goizetan, 11:00etatik 15:00etara.
• Arratsaldeetan, 16:00etatik 22:00etara.

Edonola ere, ordutegia berezia da egun seinalatuetan:

• Gabon gauean eta Urtezahar gauean, 19:00etan itxiko da.
• Eguberri egunean eta Urteberri egunean, 12:00etan irekiko da.

Aldez aurretik antolatu zure bisita, eta, topera gozatzeko, aprobetxatu jende gutxien joaten den egunak.

Prezioak eta deskontuak guztientzat

8 euro soilik ordainduta, ordubetez patinatu ahal izango duzu, patinen alokairua barne dela. Gainera, askotariko deskontuak daude, jarduera kolektibo guztien eskura egon dadin:

• Sarrera doan: % 33tik gorako desgaitasuna dutenak eta itsuak.
• 2 euroko deskontua: familia ugariak, guraso bakarreko familiak, 65 urtetik gorakoak, langabeak, eskola-programako ikasleak eta gizarte-elkarteetako kideak.
• 3 euroko deskontua: langabezian dauden 55 urtetik gorakoak.
• Taldeentzako deskontuak: 25 pertsona baino gehiagoko taldeen erreserbak (aldez aurretik egin behar da erreserba, 900 30 31 32 telefonoan).

Iruñeko izotz-pistako jarduera bereziak

Pista ez da nahierara patinatzeko soilik; patinaje artistikoko erakustaldi ikusgarrien agertokia ere bada.

Uharte Izotz Taldeak, Cristina Udina patinatzaile ezagunak gidatuta, teknika eta artea uztartzen dituzten koreografia batzuk aurkeztuko ditu abenduaren 23an eta 30ean, 16:00etan. Sekula halako erakustaldirik ikusi ez baduzu, harrituta geratzeko aukera bikaina duzu!

Joan aurretik kontuan izan behar dituzun aholku praktiko batzuk

Hona aholku batzuk zure esperientzia ahalik eta erosoena eta seguruena izan dadin:

• Eraman arropa beroa: mugitu egingo zaren arren, hotza sumatzen da. Ezinbestekoa da geruza erosoak, eskularruak eta galtzerdi lodiak eramatea.
• Antolatu zure bisita: begiratu noiz diren ordutegi bereziak eta, taldean bazoaz, kontuan izan erreserba egiteko aukera.
• Aprobetxatu deskontuak: deskonturen baterako baldintzak betetzen badituzu, ez ahaztu dagokion dokumentazioa eramatea.
• Patinatu segurtasunez: pista zaindua dago, baina istripurik ez gertatzeko, garrantzitsua da arauak betetzea.

Patinatzea baino gehiago: jai-giroa

Pista dibertigarria da, baina ez hori soilik; nabarmentzekoa da haren kokaleku aparta ere, Sarasate pasealekua, hirigune bete-betean kokatzen zaituena.

Handik urrats gutxira kokatzen da Gazteluko plazako Gabonetako azoka, non eskura izango baitituzu artisau-lanak, bertako produktuak eta eskaintza gastronomiko gozo-gozoa. Azoka abenduaren 14tik urtarrilaren 6ra irekiko da, goizez eta arratsaldez.

Iruñeak, gainera, bere aurpegirik onena erakusten du, Gabonetako argi ikusgarriekin kaleak eta plazak edertuta.

Jaiotzak gustatzen bazaizkizu, ez huts egin Takonerako lorategietako eta udaletxeko erakusketak. Jaiak amaitzeko, azkenik, ikuskizun ahaztezina izango da urtarrilaren 5eko ohiko errege-desfilea.

Nola joan Iruñeko izotz-pistara eta non aparkatu

Iruñeak ezin garraio-konexio hobeak ditu, eta erraz irits zaitezke, bai autoz, bai garraio publikoan.

• Autoz: ordaindu nahi ez baduzu, aparkatu Trinitarios edo Soto de Lezkairu doako aparkalekuetan. Hirigunetik hurbilago aparkatu nahi baduzu, aukera erosoak dira Gazteluko plazakoa eta Baluartekoa.
• Garraio publikoan: hiriak lotura onak ditu trenez, autobusez eta hegazkinez. Noaingo aireportutik hirigunera joateko, aski da taxi bat edo 212 hiri-autobusa hartzea.

Iruñeko izotz-pista aisialdia baino gehiago da. Hiria betetzen duen gabon-giroan murgilduta familian, lagunekin nahiz bakarka gozatzeko aukera bat da.

Izotzetan irristatzearen zirrarak, eta pistaren inguruan txokolate bero batek ematen duen goxotasunak, denak laguntzen du oroitzapen ahaztezinak sortzen.

Ez pentsatu birritan! Gabon hauetan, egin geldialdi bat Sarasate pasealekuko izotz-pistan, eta ahaztezin bihurtuko duzu Iruñeko bisita. Gogoan izan urtarrilaren 6a dela azken eguna esperientzia liluragarri hau bizitzeko.