Euskadin gozatzeko igerileku natural onenak

Epa, lagun! Euskadin freskatzeko planen baten bila bazabiltza, utzi jendez lepo dauden hondartzak alde batera eta presta zaitez bertako igerileku natural onenez gozatzeko. Bai, hala da. Naturak benetako oasiak eskaintzen dizkigu Euskadin, mendi, ibai eta ur-jauzi artean.

• Nafarroako abentura-parkeak, dibertsio eta naturaz beteak 🌳

Inguru hau ezin hobea da naturaz inguratuta murgil egiteko, mendiak ematen duen lasaitasunarekin eta ur gardenaren freskuran.

Euskadin gozatzeko igerileku natural onenak

Putzu basatiak, familia osoarentzako leku irisgarriagoak... Argitalpen honetan, ura eta inguruak bat egiten eta paradisu natural paregabe bat eratzen duten leku liluragarrietara eramango zaitugu. Hartu mendiko zapatilak, ogitartekoa eta toalla, bainu ederra hartuko dugu eta!

Elantxobeko igerileku naturala

Portuko harkaitz artean ondo gordetako sekretua da Elantxobeko harribitxi hau. Hormek babestuta eta Ogoñoko badiara begira dago, eta leku ezin hobea da ur gazitan murgiltzeko, lasaitasun osoan!

Kantauriko olatuen eta portuko giroaren artean dagoenez, plan biribila da hemen bainatzea. Eta ez galdu mendi-magalean dauden koloretako etxetxoak, euskal kutsu xarmagarria dute!

Mutrikuko igerileku naturalak

Mutrikuk bi igerileku natural olinpiko ditu. Kantauri itsasoa harkaitz artean sartzen da, eta igerileku fresko bat sortzen du. Toki bikaina da igeri egiteko, urpekaritzan aritzeko edo jauzi egiteko. Udan, gainera, txiringitoa eta sorosleak edukita, ez duzu gehiagoren beharrik izango.

Gipuzkoako kostaldeaz gozatzea gustatzen bazaizu, portu ondoko txoko honek liluratu egingo zaitu.

Fresnedoko ibai-igerilekua

Izkiko Parke Naturalaren ondoan, Araban, Fresnedoko ibai-igerilekua daukazu. Igerilekua ibaian bertan dago, eta inguruan daukan aisialdiko eremuak behar duzun guztia eskaintzen dizu: mahaiak, erretegiak, saskibaloi-zelaia eta baita haurrentzako jolasak ere.

Leku ezin hobea da eguna lagunartean edo familiarekin pasatzeko. Gose bazarete, ez kezkatu, udan taberna bat ere badago eta. Ur gardena, giro ona eta natura. Zer gehiago eska daiteke?

Urumeako putzuak

Plan basatiago bat nahi baduzu, bisitatu Urumeako putzuak Hernanin. Ez dago aldagelarik, ezta dutxarik ere, baina paisaia ikusgarria da. Ur hotz eta garbia eta berdetasuna nonahi.

Leku ezin hobea da beroari ihes egin eta naturarekin konektatzeko. Ez da oso leku ezaguna, eta horrek are hobe bihurtzen du lasaitasun bila dabiltzanentzat.

Belandiako errota

Urduñan, Belandiako Errota bisitatu dezakezu. Lekuak postal batetik ateratakoa dirudi. Igerileku natural hau landaredi basatiaz eta ukitu berezia ematen dioten harkaitzez inguratuta dago.

Antzinako harrizko errota horrek ukitu historiko itzela ematen dio eta lekua magiko bihurtzen du. Hartu bainu fresko bat ur gardenetan, eta deskonektatu eta gozatu naturaz giro lasaian.

Bolintxuko ur-jauzia

Bilbotik oso gertu, Pagasarriren magalean, dago Bolintxuko ur-jauzia, paradisu ezkutu bat.

Bertara iristeko, 4 km inguruko ibilaldi arin bat egin beharko duzu, ibarbaso bat zeharkatuz. Hara iritsitakoan, ur-jauzi bat topatuko duzu, ur ezin gardenagoko putzu bat eratzen duena. Ipuinetakoa dirudi. Hiriko zalapartatik ihes egin eta naturarekin konektatu nahi baduzu, hau da leku egokia.

Pozubaltz (Oromiñoko ur-jauzia)

Iurretan, Pozubaltz bisitatzeko aukera duzu. Abenturazko film batetik ateratakoa dirudi. Ura Oiz menditik dator zuzenean, garbi eta garden. Ezin hobea da natura betean murgil egiteko.

Bertaraino iristeko, ibilbide labur bat egin behar da oinez, eta horrek ere ematen dio abentura-kutsu atsegina. Gainera, ez da batere leku ezaguna; beraz, lasaitasun bila bazabiltza, ez dago leku egokiagorik.

Atxuriko putzuak

Gorbeiako Parke Naturalaren erdi-erdian kokatutako igerileku natural multzo honek aho zabalik utziko zaitu. Bertara iristeko, ongi seinaleztatutako bidexka bat jarraitu behar diozu. Hala, bidean ere paisaiaz gozatu ahal izango duzu.

Ura fresko eta garbi dago, eta leku ezin hobea da natura ikusgarriz inguratuta murgil egiteko. Plan bikaina da ibili eta ondoren leku paregabe batean freskatu nahi baduzu.

Artikutzako putzuak

Artikutza Nafarroako mirari natural bat da, bisitatzea merezi duen baso magiko batean kokatua. Babestutako haran horretan, ur gardeneko putzuak izango dituzu zain. Paregabeak dira bertan murgildu eta dena ahazteko. Landaredia oparoz inguratuta dago, eta oso inguru lasaia da naturarekin sakon konektatu nahi dutenentzat.

Leitzarango putzuak

Leitzarango bailara ikusgarria da. Ingurune natural babestua da, eta ur ezin garbiagoko hainbat putzu ditu.

Bailara zeharkatzen duten ibilbideak ezin hobeak dira bertako txokoak ezagutu eta putzuetara heltzeko. Ordainsari fresko-fresko bat izango duzu zain, naturaren erdi-erdian. Leku bikaina da mendian ibiltzea eta naturan bainuak hartzea gustuko dutenentzat.

Esan ohi da zerbait gustatzen bazaizu hobe dela zuretzako gordetzea, jendez lepo bete eta kaltetu ez dadin. Kasu honetan, deskonektatu eta naturaz goza dezazun nahi dugu, baina ongi dago lagunei edo senideei inbidia emateko argazki bat bidaltzea.

Baita konexio egonkorra izatea ere, gal ez zaitezen. Horretarako gaude gu. Goza ezazu. Guuk arduratuko da zu garrantzitsua denarekin konektatzeaz. 💚